كتبت الصحفية وعد أبو زاهر على حسابها الرسمي على موقع فيسبوك:

اليوم كنت أول مرة بغطي خبر المقابر الجماعية.. وكانت رجل بتقدم ورجل بتأخر بس الجهة اللي بشتغل معها طلبت مني تغطية الخبر.

أكثر اشي آثار داخلي شعور بالغضب

إنه الشهداء دفنوا وحدهم، بدون وداع، بدون ورد وياسمين، بدون حضن، بدون قبر... بيندفنوا هيك ببرود.

أهالي الشهداء ولا حد جاي يودعهم لأنه محدش عارف مين ابنه ومين أخوه ومين أبوه .. ولا حد حتى اللي جاين معرفوش يتعرفوا على حد علشان الجثث ذايبة (بنتقط ميا)

|

صرت كل جثة بطلعوها اودعها، .. اقف قدامها بكل خوفي. شميت ريحة 88 جثة، كل جثة ريحتها "بتطلع الروح" أكثر من اللي قبلها .. شفت الكونتي الأبيض مخلوط باللحم والتراب، شفت شعر ست، شفت بوط شاب مبللول دم، شفت نص جثة.

حطيت حالي مكان كل أم أو أخت أو بنت جثة فيهم.

اكم أم قلقانة ع ابنها؟ اكم زوجة عندها أمل تلاقي زوجها؟ اكم أخت بدها تحضن اخوها؟ واكم واكم ..

يمكن عنجد يكون مجرد خبر عادي لكثير منكم زي كل الأخبار .. بس والله ما هو عادي .. شو يعني كل هلي بصير؟ .. والله جد شو يعني؟ وليش كل هادا بصير فينا؟

أنا بكره كل هذا العالم